"Тіл байлығы - ой байлығы" тілдер апталығы өтті
2025 жылдың 5 қыркүйек күні Қазақстан халқы тілдері күніне арналған «Тіл байлығы – ой байлығы» атты жалпы мектептік іс-шара өткізілді. Мереке Ахмет Байтұрсынұлының туған күнімен тұспа-тұс келіп, оның тіл ғылымындағы еңбегі мен қазақ әліпбиін қалыптастырудағы рөлі кеңінен насихатталды.
Іс-шараға мектептің 1–11 сынып оқушылары қатысты. Жиын Қазақстан Республикасының Мемлекеттік Әнұранын орындаумен басталып, мектеп әкімшілігі мерекенің маңызына тоқталып, тілдің ұлт болашағындағы орны туралы ойларын ортаға салды.
Шара барысында бастауыш сынып оқушылары тіл туралы өлеңдер оқып, өз өнерлерін көрсетті. Орта буын оқушылары А.Байтұрсынұлының қанатты сөздері мен еңбектерінен көрініс қойып, тіл тарихына шолу жасады. Жоғары сынып оқушылары «Ана тілім – асыл қазынам» тақырыбында эсселерін оқып, мемлекеттік тілдің қоғамдағы рөліне байланысты пікірлерін білдірді. Сонымен қатар, 10–11 сынып оқушылары арасында «Тілім менің – ғасырларға аманат» атты пікірсайыс ұйымдастырылып, онда қазақ тілінің болашағы мен мәртебесін арттыру мәселелері талқыланды.
